School - The Skit

Ye kahani har baar ek nayi taazgi de jaati hai jo mai yaha share kar raha hoon...

School ke din...zindagi ke sabse yaadgaar lamho ka pitaara jo shayad hum kabhi nahi khona chahenge. Unhi kuch yaadon me se ek mp3(mera pehla pehla pyaar) jo 9th standard ke saath hi shuru hua. . .

First floor, class ka corridor, mai aur mera best friend(Abhishek) hmesha ki tarah lunch break me baatein kr rhe the lekin us din kuch khaas tha kyu ke us din 'wo' mujhe pehli baar dikhi! Meri aankhein to jaise atak si gayi thi uske chehre pe, wo hasi aaj bhi mujhe yaad hai jise dekh kar 'smiling face wala ladka' dikh raha tha mai according to Abhishek...Kamina!

School ke ek skit me meri ek friend ki achanak tabiyat kharab ho gai jo meri partner thi(patient aur nurse), mai patient tha aur tabhi entry hui 'uski' ...meri khushi ka thikaana na raha aur mere saare dost mujhe pareshan karne lage lekin ab kya hi farak padna tha mujhe ...ab wo jo mere saath meri partner ban gai thi..skit me hi sahi. Waise ye dusri baar takraaya tha mai 'usse' :)

Practice ke time hum kafi ghulmil gaye aur finally wo din aa hi gaya jab hume perform karna tha! Skit me meri neck me sprain hai aur mai doctor ke pas jata hu.. itne me aati hain humari nurse('wo') jinhe dekhte hue meri neck left to right ghumne lagti hai aur doctor mujhe jane ko kehta hai aur mai nurse ko dekhte hi rehta hoon aur knee me baith ke sabke samne baahein faila kar propose kar deta hoon! Ab improvisation dekhiye ke nurse ko bahar ka rasta dikhana tha patient ko lekin yaha 'usne' meri collar pakad ke mujhe apne saath hi bahar kiya aur hum dono pagalon ki tarah haste hue off stage ho gaye...us raat poore school ne taaliyon se humari performance ko appreciate kiya!