Ang Pasko / Banal Na Pagsilang

Ang daigdig sa ganitong araw,

Tuwa at saya sa bawat galaw,

Dahil ngayon isinilang,

Ang banal na Nilalang.

 

Taong may-loob sa Amang Diyos,

Nagpapasalamat ng lubos,

Sa pagbigay ng Biyaya,

Sangkatauhan ay lumaya.

 

Nagdaraos ang simbang gabi,

Misang alay kay Hesus palagi,

Dito maalala kahit sandali,

Ang makasaysayang pangyayari.

 

Pagkatapos ng misa’y agahan,

Sama-sama sa hapag kainan,

Bibingka’t puto-bungbong una sa lahat,

Kasama ang mainit na salabat.

 

Pagdating ng araw ng Pasko,

Tila’y sagana sa regalo,

Pamilya’t kaibigan nagsalo-salo,

Sa noche buenang walang katalo-talo.

 

Bata o matanda’y maligayang tunay,

Mayaman o mahirap galak ang taglay,

Lahat taos pusong nagdiriwang,

Sa araw ng banal na pagsilang.