Kristohanon, Intawn Pamati Kamo!

KRISTOHANON, INTAWN PAMATI KAMO!

 

 

Sa kadaghan sa mga plano

Sa kataas sa mga damgo

Sa usa kapagpamilok nahimong abo

Walay bisan usa nga makapasigarbo

 

Tibuok kanasuran gilud-an

Pobre man o adunahan

Tanan pwedeng sa Covid mataptan

Masakiton o himsog man ang kalawasan

 

Kagahapon lang pagkamapahitas-on mo

Kay ikaw lagi tag-iya ug dako nga negosyo

Ug tungod sa imong nindot nga trabaho

Halos di ka mulingi sa mga mas ubos pa nimo

 

Apan tan-awa karon higala

Bisan ang gipanghambog mo nga pamilya

Sa imong kasakit wala sila

Hangdtud sa lubong ikaw nag-inusara

 

Kristohanon, intawn pamati kamo!

Mao ba kini ang inyong gikasuyaan pag-ayo?

Ang iyang kadato ug pag-asenso?

Tan-awa, sud-unga ug tutuki ninyo!

 

Nakahuna-huna ba kamo sa iyang padulngan?

Nakapugong ba sa kamatayon ang iyang kaadunahan?

Di ba pinisik ra sa laway ang hinungdan,

Ang nagtuklod kaniya sa iyang utlanan?

 

Ang pangutana karon higala,

Asa paingon ang kalag niya?

Di ba sa kalayo nga walay undang sa pagsiga?

Busa walay rason nga ikaw masina kaniya!

 

Kristohanon, intawn pamati kamo!

Undangi na ninyo ang pagsige ug reklamo,

Hinoon pasalamati ninyo ang Ginoo,

Tungod kay Siya nakaila ninyo.

 

Sa panahon sa pandemya

Ang atong pagka-Kristohanon ipakita ta

Ayaw ug sige’g bagotbot sa social-media

Hinoon suga ni Kristo pasigaha

 

Malisod man ang atong kahimtang sa kalibutan

Apan intawon ayaw kini ug igsapayan

Tungod kay ang nagpaabot kanato sa unahan

Kinabuhing may hingpit nga kapahulayan

 

Kapahulayan nga kang Kristo lang makaplagan,

Kapahulayan nga angay ipaambit sa tanan.

Apan kung ikaw Kristohanon nga bagulbulan

Unsaon man pagkabig diha kang Kristo sa uban?

 

Kristohanon, intawn pamati kamo!

Karon ang oras nga pahayagon ta si Kristo.

Ipakita ta nga nagpuyo kanato ang Balaang Ispirito,

Pinaagi sa atong pagkamapasalamaton sa Ginoo.

 

Pasalamatan ta ang atong kaluwasan

Pasalamatan ta ang atong Langitnong Amahan

Pasalamatan ta si Hesus nga kanunay kanato nag-uban

Kay tungod Kaniya wala ta’y angayan nga kahadlukan

 

Daygon ta si Kristo mga higala!

Bisan sa panahon sa pandemya!

Kay Siya ang manluluwas ta,

Kasigurahon sa kinabuhi maana lang Kaniya!

 

 

 

 

 

 

 

Reviews

[Himaya Ka]

If you don't understand it, just google the translation. :D