Kung Saan Nanggagaling ang Tinig

May mga umaga

na ang unang kausap ay ang init sa pintuan ng araw

hindi ito nagtatanong,

kundi humihimlay,

tulad ng paanyayang hindi binibigkas, ngunit nadarama.

Hawak ko ang panulat

na tila marunong sumunod

sa mga hudyat na hindi pa abot

ng mata.

May hila sa loob,

parang yapos ng umaga

na hindi matanaw ng mata,

ngunit nararamdaman ng bawat hakbang,

at ako’y sumusunod

kahit hindi tiyak ang landas.

May mga salita

na dumadaloy

hindi mula sa isip

kundi mula sa isang pook

na puno ng lihim na alab,

parang panawagan

na hindi galing sa akin,

kundi sa Kanya.

At sa gitna ng paggawa,

may katawan na natutong makinig,

may pusong hindi naghahanap ng papuri,

kundi ng kapayapaan

na higit pa sa lahat ng narinig 

Ang gawain ay hindi akin,

ako’y daluyan lamang

ng isang tinig na mas malalim,

mas matibay,

na dumadaloy sa mas matinding pagninilay

kaysa sa sarili.

Reviews

[Sami Khalil]

You are a medium, a vessel, a conduit to the inspiration that flow through you to become words, alive for all to see.